Me komencis lernar la linguo inter-naciona dek yari ante nun. Ho! quante la tempo flugas… Me memoras la sunoza dii kande me skriptis, kun poka diferi, la yena poemo en la Franca:
Soleil d'été
Tu m'illumines
Ô bonne mine
Maintenant j'ai!
Lune d'automne
Sois mon lampion
De la saison
Si monotone!
Flocons de neige
Immaculés
D'un blanc sacré
Quel beau cortège!
Bourgeons d'espoir
Tant hâte j'ai
De te revoir
À mes côtés…
L'unesma linei subite aparis en mea spirito kande mea okuli dazlesis da lum-radii en ula matino di printempo 2024.
Me nun preske evas 26 yari, ed en 2013 me evis cirkume 15 yari. Sam-tempe me multe chanjis, e sam-tempe me restis la sama. E quankam me tra-pasis diferanta pasioni, diferanta amikesi, diferanta amori, diferanta lukti, Ido restis e restas esar la cintilo qua acendas mea kordio irge kande me sentas vakueso en mea spirito.
Ti qui bone konocas me (me inkluzite) forsan remarkis ke me tendencas vivar cikli en mea vivi. E ta cikli semblas plu o min sequar la sezoni. Me lasis Ido dop me dum la pasinta monati, e nun me retrovenas… Ka me ne ja agis ulo simila pasinta-yare? Me nun es en ta ciklo qua anxias pro laboro universitatal, pro la somero qua adias, pro la tempo qua flugas, kun mea energio, kun mea motivozeso—la vakueso qua proximeskas me, e mea spirito qua dicas a su: ka tu pavoras la nihilo? Or pro quo tu tante serchas ol?
Se la ciklo duros, en printempo me forsan probos reformar la linguo, od altra stultajo. Advere la cikli iteresas, ma mea energio ne es la sama kam antee. Olim me sentis ne nur granda entuziasmo ma anke granda amo por Ido e sam-tempe granda odio kontre ol. Un de ta odii esis la tri-silaba pronunco di «fairo», qua ver-simile solvesis da nia sam-ideano Gonçalo tre recente. No, me trovis la libri a qui me maxim fidas, me pozis li aden mea retloko https://www.lernez.com e me esperas deviacar nek de ta linguala literaturo, nek del kustumi komunitatal—qui pos meditado ne tante deviacas ipse de la literaturo. Ca foyo es forsan la justa, nam nun—pos explorir Esperanto ed Interlingua detaloze—me koncias pri la prioraji. Od adminime me kredas lo. Ido bezonas uzesar. Quale on dicas en la Angla: the proof of the pudding is in the eating.
Me remarkis ke la Ido-renkontri omna-saturdia (o preske) duras eventar. Por me to es granda joyo, mem se me ne parto-prenas li, e me es tre kontenta vidir ke Gonçalo anke parto-prenas li nun. Ido vivas, e to es grava bezono por me.
Pro quo me ne parto-prenas li? Me ne habitas sola che me, me vivas kun mea matro. E por me la matini saturdial es kustumale tempi di repozo, di silenco. Do ruptar ta pauzo per lauta diskuti en linguo stranjera… me preferas skribar.
Ca-somere, me laboris en laboratorio kun ciencisto pri genetiko. Mea laboro esis uzar genealogio por identifikar strukturi sub-popula qui indikus, exemple, la riski developor morbo heredebla.
Por esar plu exakta, me studiis un del maxim kompleta arbori genealogial en la mondo, di qua la maxim recenta membri vivas o vivis en mea nasko-regiono, Saguenay—Lac-Saint-Jean. Ta projeto, nomata la BALSAC-failo, kontenas plu kam tria-centa-mil individui, rikonstruktita ek civila dokumenti (pri mariaji, bapti, edc.)
Per informatikal funcioni, me sucesis analizar la relati inter ta individui segun ciencal principi di biologio (populal genetiko): la koeficienti di konsanguineso, di parenteso, la kontributi genetikal, edc.
Per ta analizi, me esperas ke ul-die on sucesos identifikar la maxim probabla ancestri qui ad-portis certena morbi al regiono (per la fondintal efekto) segun la maniero en qua la morbo heredesis, e tale ameliorar la precizeso (en ciencal termini: sentiveso e specigiveso) dil nuna praktiki di detektado e preventado dil morbi, qui povas esar tre kustoza.
Ta laboro es tre ecitanta por me, e me juas ke me povos durar ol por mea bacheloreso dum magistreso pri duriva saneso.
Ta someral projeto es l'unesma foyo depos mea studiado en medicino ke me sentas konkordo inter mea intereso e mea produktiveso. En medicino, me kelke sucesis studiar la temi ma sempre devis evitar fugar ad altra interesi tal quala Ido. En neurocienco, la musi semblis a me ne sat interesiva e me desprizis la nivelo di izoleso en qua me trovis quik pos la komenco di COVID-19 en marto 2020.
En informatiko, la temi interesas me, me es produktiva, ma la profesori es tante tedanta pro lia semblanta manko di entuziasmo e di kompetenteso docal, ke me tandem rezolvis nur agar lo necesa e nulo plusa. Regretinde, en mea universitato plura profesori docas pro obligeso, nam ta tasko es obligal kande on volas facar serchado ciencal.
Nun es la tempo kompletigar demando por forsan obtenor stipendio dum mea magistreso… Demando qua igas me anxiar. Me devas prizentar me ipsa e mea laboro kom modeli di ecelo, quo tote ne semblis a me esar la kazo en la pasinta yari. Me serchas la vorti por deskriptar, ma ta serchado quik duktas me prokrastinar mea skriptado. Do vice skriptar por stipendio, me riorganizas la hemo, me riinstalas la fonografilo, me ludas tablo-teniso e… me probas skriptar kelka linei en Ido.
Comments
Post a Comment